Si Kabayan Nulis Berita Maké Tools AI

TIGARUT.COM — Si Kabayan keur diuk ngetéyép di pojok kantor média online. Manéhna keur puyeng sabab kudu nyieun tulisan panjang ngeunaan “Ekonomi Kreatif di Lembur”. Keur kitu, datang babaturanana nu sok mawa béja, Si Lamsijan.

“Kabayan, naha bet pusing ngetik? Ayeuna mah aya ‘Jig jépiti’ (ChatGPT)! Manéh tinggal nanya, tulisan langsung jadi sakiceup!” ceuk Lamsijan bari némbongkeun hapéna.

Si Kabayan olohok. “Hah? Jadi dewek teu kudu mikir? Cukup ngomong hungkul?” “Heueuh, Kabayan. Tinggal ngetik naon kahayang urang, éta mesin bakal nulis sorangan kawas nu pinter!”

Akal Bulus: Berita Mesin, Nu Nulisna Molor

Si Kabayan langsung nyobaan. Manéhna ngetik paréntah dina AI: “Jieun berita panjang tur ilmiah ngeunaan mangpaat nangka pikeun ekonomi warga.”

Teu nepi ka semenit, dina layar hapé Si Kabayan geus aya tulisan panjang pisan, bahasana alus, sopan, jeung jiga tulisa

n doktor. Si Kabayan seuri konéng. “Walah… bener euy! Mending kénéh kieu, AI nu digawé, dewek nu molor!”

Manéhna langsung copy-paste éta tulisan, terus dikirim ka Redaktur tanpa dibaca deui sakalimah-kalimah acan. Geus kitu, Si Kabayan langsung ngajonéngré saré di handap tangkal tanjung.

Momen “Tigarut” Digital (Zonkgét)

Isukna, Si Kabayan datang ka kantor bari gaya pisan, niatna mah rék nanya bonus. Tapi, di panto kantor, Abah (nu ayeuna jadi Pimréd/Pimpinan Redaksi) geus nunggu bari beungeutna beureum siga nangka asak.

“Kabayaaaan! Kadieu sia!” Abah ngagorowok nepi ka kaca kantor asa rék peupeus.

Si Kabayan reuwas, manéhna lumpat muru Abah, tapi duka kumaha suku katuna titajong kana kabel komputer nu ngaleuyé (kabel malang). Sleeeep… Gedebug! Si Kabayan tigarut nepi ka irungna ampir nium lantai kantor.

“Aduh, Abah… naha bet tos ambek-ambekan deui?” ceuk Kabayan bari muringis nyekel irung.

Bahasana Mesin, Lain Basa Lembur

Abah ngalungkeun print-out berita Si Kabayan. “Tempo ieu tulisan sia! Judulna mah alus, tapi eusina naon?! Di dieu disebutkeun: ‘Nangka adalah sumber karbohidrat utama yang bisa menyejahterakan robot di masa depan’. Terus di handapna aya tulisan: ‘Sebagai model bahasa AI, saya tidak memiliki perasaan tentang nangka’. Sia téh nulis berita atawa nulis curhat mesin?!”

Nyi Iteung nu jadi sekretaris di dinya ogé mairan, “Enya Kang Kabayan, piraku dina berita aya kalimah: ‘Silakan tanya kembali jika Anda butuh bantuan lain’. Eta mah gaya nulis robot, lain gaya manéh!”

Ngalesotkeun Éra ku Alésan Téknologi

Si Kabayan, sanajan irungna masih nyeri tapak tigarut tadi, langsung nangtung ajeg. Manéhna nyisiran buukna nu rada acak-acakan.

“Hih, Abah, Iteung… éta téh lain salah Kabayan. Éta téh gaya nulis ‘Masa Depan’! Kabayan keur ékspérimén, kumaha mun robot diajak ngala nangka. Éta tulisan téh kode rahasia sangkan urang lembur melek téknologi,” ceuk Kabayan bari kalem pisan.

Abah gogodeg. “Loba omong! Pék hapus deui, tulis deui ku leungeun sia sorangan! Mun henteu, sia nu ku dewek dijadikeun robot keur ngala jukut di kebon!”

Si Kabayan ukur bisa pasrah. Manéhna balik deui ka méjana bari ngagerentes, “Duh, AI… naha manéh bet jujur-jujur teuing ngaku robot, pan dewek jadi katara kedulna…”

Bersambung deui ah!