Si Kabayan Jadi Driver Ojek Online

TIGARUT.COM — Si Kabayan geus resmi jadi mitra ojol. Manéhna gaya pisan maké jaket héjo nu rada sereg dina beuteungna. “Iteung, Akang ayeuna mah moal deui dicarékan ku Abah. Akang geus jadi ‘Ksatria Jalanan’! Tinggal nungguan ‘bip-bip’ dina hapé, duit datang sorangan,” ceuk Kabayan bari ngusapan hélemna.

“Enya Kang, tapi ulah kalah ‘ngetéyép’ saré dina jok motor nya! Ojol mah kudu gercep (gerak cepat)!” témbal Iteung bari nali-nalikeun barang daganganana.

Ngudag Rating, Moro Alamat

Teu lila, hapé Kabayan disada. Bip-bip! Aya pesenan asup. “Tah, aya! Juragan Haji rék mesen nangka asak ti pasar. Ieu mah spesialis Akang!” ceuk Kabayan bungah.

Manéhna langsung ngebut. Tapi, dasar Si Kabayan, manéhna sok hayang pinter sorangan. Manéhna embung nuturkeun Google Maps. “Ah, map mah sok nyasabkeun. Akang mah make ‘Insting Kabayan’ baé, pasti leuwih gancang!” Manéhna milih jalan potong (jalan pintas) nu ngaliwatan kebon awi jeung galengan sawah.

Momen “Tigarut” Driver Ojol

Kabayan ngebut bari leungeun kencana nyekel hapé, panonna fokus kana layar aplikasi bisi aya parobahan alamat. “Sakedik deui nepi… ieu mah jalan tembus ka imah Juragan Haji,” gerentesna.

Teu kanyahoan, di hareupna aya akar tangkal nangka nu niniut sarta jalan nu rada leueur balas hujan tadi peuting. Sleeeep… Drrrr… Gubrag!

Ban motor Si Kabayan tigarut kana akar, motorna tiseureuleu ka kénca, sarta awak Si Kabayan ngajéngkang asup kana solokan leutik sisi sawah. Jaket héjona nu anyar kénéh téh langsung robah jadi warna coklat pinuh ku leutak. Pesenan nangka nu dibungkus palastik ogé ngacleng kana luhur tangkal.

Alesan “Fitur Off-Road”

Nalika Si Kabayan keur sosorodotan hudang tina solokan, Juragan Haji kabeneran liwat mawa mobilna. “Euleuh, Kabayan! Naha manéh bet mandi di solokan bari maké jaket ojol?!”

Si Kabayan buru-buru nangtung, sanajan sukuna rada muringis. Manéhna langsung nyokot hapéna nu untungna teu peupeus.

“Hih, Juragan… tong kaget. Ieu téh fitur anyar ti aplikasi ojol, nyaéta ‘Layanan Off-Road’. Kabayan nuju mastikeun yén rute ieu aman pikeun diliwatan ku motor séjén. Ieu téh bentuk pelayanan prima ka konsumén, Juragan!” ceuk Kabayan bari nyénghel, sanajan beungeutna pinuh ku jukut cai.

Pamungkas: Béntang Hiji

Sorena, Si Kabayan balik ka imah bari leumpang nungtun motor nu méh baé mogok. Pas ditingali dina aplikasi, Juragan Haji méré rating Béntang Hiji.

Komentarna: “Driverna maceuh, nangka pesenan kuring kalah nyangsang dina tangkal deui. Jalma téh lain ojol, tapi badut jalanan!”

Abah nu maca éta komentar langsung nyokot sapu nyéré. “Kabayaaaan! Sia mah jadi wartawan tigarut, jadi ojol tigarut! Isuk mah manéh jadi ‘Driver Kasur’ baé di kamer, ulah kaluar imah!”

Si Kabayan ukur bisa pasrah bari ngagerentes, “Duh, bener ceuk Iteung, téknologi mah moal bisa dilawan ku ‘Insting Kabayan’ nu keur tunduh…”