Si Kabayan Jadi Pewarta Media Online
- account_circle Redaksi Tigarut
- calendar_month Rabu, 25 Feb 2026
- print Cetak

info Atur ukuran teks artikel ini untuk mendapatkan pengalaman membaca terbaik.
TIGARUT.COM — Si Kabayan ayeuna geus gaya, bajuna mah kaos oblong tapi maké rompi loba saku nu aya tulisan “PERS” badag pisan dina tonggongna. Gawéna jadi wartawan di média online “Tigarut.com”. Isuk-isuk, manéhna geus disidék ku dununganana, Redaktur nu galakna leuwih-leuwih ti Abah.
“Kabayan! Mana warta dinten ayeuna? Urang peryogi berita anu viral, anu matak klik-un ku batur! Target urang sapoé kudu sapuluh berita!” ceuk Redaktur bari ngagebrak méja.
Si Kabayan nguliat. “Aduh Bos, pan milari berita téh kedah nganggo rasa. Moal tiasa rurusuhan, bisi beritana janten ‘hoax’ alias wadul,” témbal Kabayan bari anteng ngome hape.
Akal Bulus Wartawan Kedul
Sangkan teu capé teuing moro berita ka ditu ka dieu, Si Kabayan calik baé di handap tangkal tanjung bari numpangkeun suku. Manéhna boga prinsip: “Daripada moro berita, mending berita nu nyampeurkeun urang.”
Kabayan ningali aya ucing keur gelut jeung hayam di tengah jalan. Otakna langsung muter. Manéhna moto éta kajadian, terus ngetik judul berita dina hapéna.
Judulna: “GEGEGERAN! Tawuran Berdarah di Tengah Jalan, Saksi Mata Sampai Gemetar!”
Padahal mah ngan ucing rebutan tulang lauk, tapi ku Si Kabayan dijieun judul anu matak muringkak bulu punduk sangkan batur panasaran hayang klik.
Momen “Tigarut” Digital
Keur anteng ngetik bari leumpang (niatna mah rék néangan sinyal nu leuwih kuat), Si Kabayan poho kana jalan. Panonna neuteup waé kana layar hape, jempolna gancang pisan ngetik caption “Viral di Lembur”.
Di hareupna, aya solokan leutik nu keur dibébérés ku warga. “Sakedik deui, pencét Publish…” gerentesna.
Sleeeep… Gebros!
Lain waé tigarut kana batu, tapi Si Kabayan langsung ticepluk asup kana solokan. Hapéna ngacleng, untungna mah ragrag kana jukut, tapi awak Si Kabayan mah mandi leutak.
Ngalesotkeun Éra ku Berita Anyar
Nyi Iteung nu kabeneran keur nyeuseuh di deukeut dinya langsung lumpat reuwas. “Ya Allah, Kang Kabayan! Naha bet nyemplung ka solokan? Eta rompi Pers mani pinuh ku leutak kitu!”
Si Kabayan gura-giru hudang. Sanajan awakna bau solokan, manéhna tetep tenang. Hapéna dicokot, terus manéhna kalah moto solokan jeung sukuna nu leueur.
“Hih, Iteung… Akang téh lain labuh. Ieu téh keur ‘Investigasi Lapangan’! Akang nuju ngetés kumaha jerona solokan di lembur urang, sangkan janten berita: ‘Wartawan Rela Nyemplung ka Solokan Demi Kasejahteraan Warga’. Ieu téh totalitas tanpa batas, Teung!”
Pamungkas: Redaktur Ngamuk
Nalika berita éta dikirim ka Redaktur, Si Kabayan lain meunang bonus, kalah dicidék deui.
“Kabayan! Naon ieu berita téh? Berita tawuran tapi fotona ucing, berita solokan tapi fotona suku manéh hungkul nu nambru?!”
Si Kabayan ukur seuri konéng bari ngagerentes, “Ah, nu penting mah geus asup target. Perkara bener atawa henteu mah, éta mah urusan ‘algoritma’…”
Bersambung ah!
- Penulis: Redaksi Tigarut
- Editor: SAB
