Si Kabayan Ngalamar Gawé ka Média Online

TIGARUT.COM — Si Kabayan geus bosen dicarékan waé ku mertuana alatan dianggap pangangguran abadi. Poe harita, manéhna nekat rék ngalamar gawé ka kantor média online “tigarut.com”. Manéhna datang maké sapatu bot sabelah jeung sapatu kets sabelah, bari mawa map coklat nu geus kuleuheu.

“Bah, ieu daptar riwayat hirup Kabayan,” ceuk Kabayan bari masrahkeun keretas ka Abah nu kabeneran jadi Manajer HRD di dinya.

Abah nyekel kacamata, terus maca lalaunan. “Kabayaaan! Ari sia cageur?! Dina kolom ‘Keahlian’, naha sia nulis: ‘Bisa saré bari nangtung’ jeung ‘Ahli komunikasi jeung hileud nangka’? Ieu mah lain CV, tapi daptar dosa!”

Interview nu “Out of the Box”

“Hih, Abah… jaman ayeuna mah kedah out of the box! Wartawan téh kedah gaduh skill unik. Upami Kabayan tiasa saré bari nangtung, hartosna Kabayan tiasa ngawaskeun berita bari istirahat,” témbal Kabayan bari leungeunna ngeteyép kana toples peuyeum dina méja Abah.

Abah gogodeg bari nepak tarang. “Sia nyaho teu cara nyieun berita nu viral? Jaman ayeuna mah kudu gerak gancang, kudu maceuh!”

“Tenang Bah, Kabayan mah ahli strategi. Tinggal calik, berita nyampeurkeun,” témbal Kabayan yakin pisan.

Momen “Tigarut” di Kantor Pusat

Pikeun ngetés mentalna, Abah nitah Kabayan mawa tumpukan koran jeung laptop ka rohangan sebelah. “Sia bawa ieu, mun teu labuh jeung teu ruksak, sia ditarima!”

Si Kabayan nangtang. Manéhna mawa tumpukan éta bari gaya pisan, sirahna tanggah ka luhur jiga model catwalk. Tapi, manéhna poho yén di lantai kantor téh keur dikepél ku Nyi Iteung.

Sleeeep… Gedebug!

Suku Kabayan tigarut kana kabel charger laptop nu malang, terus awakna tiseureuleu dina lantai nu masih baseuh. Laptop ngacleng, koran awut-awutan, sarta awak Si Kabayan ngajengkang nepi ka sukuna nyangsang kana korsi.

Alesan “Wartawan Investigasi”

Abah jeung Iteung lumpat nyampeurkeun. “Tuh nya! Can gé gawé geus nyieun ruksak!” ceuk Abah ambek.

Si Kabayan, sanajan cangkéngna asa rék coplok, buru-buru hudang bari mawa koran nu geus baseuh. Manéhna nyisiran buukna ku ramo.

“Abah… Iteung… tong salah sangka. Ieu téh lain labuh, tapi ‘Simulasi Wartawan Perang’. Akang nuju némbongkeun kumaha carana tetep nyekel berita sanajan keur ditémbakan atawa keur aya dina kaayaan darurat. Tempo, koranna tetep aman sanajan Akangna tigarut ogé!” ceuk Kabayan bari muringis nahan nyeri.

Ditarima ku Jalur Karunya

Iteung ukur bisa seuri ningali kalakuan salakina. “Bah, tos wé tampi. Karunya, meungpeung anjeunna gaduh bakat ngales nu luar biasa. Wartawan mah pan kedah pinter ngales upami ditaros ku narasumber.”

Abah antukna pasrah. “Heug! Sia ditarima, tapi tugas munggaran sia: Bersihan ieu lantai nu kotor ku tapak sapatu sia nu leutakan! Éta berita munggaran sia: ‘Calon Wartawan Tigarut, Lantai Kantor Jadi Korban’.”

Si Kabayan ukur bisa nyenghel. “Alhamdulillah, nu penting mah boga seragam Pers heula, perkara gawé mah bisa engké diakalan ku AI,” gerentesna dina jero haté. ***

Bersambung deui ah!